Tunisia yaanza kusikiliza kesi ya mauaji ya dikteta wa zamani wa nchi hiyo.


Serikali ya Tunisia imeanza kusikiliza kesi dhidi ya dikteta wa zamani wa nchi hiyo, Zine El Abidine Ben Ali, kwa kuhusika na mauaji ya waandamanaji katika vuguvugu lililomuondoa madarakani mwaka 2011.

Mbali na Ben Ali, waziri wa mambo ya ndani wa wakati huo pamoja na maafisa wa ngazi za juu wa usalama pia wanaandamwa na tuhuma hizo za mauaji.
Kamisheni ya Ukweli na Heshima iliyopewa jukumu la kusikiliza kesi hizo kwa niaba ya familia za wahanga, imeanza kusikiliza kesi hiyo katika miji ya Kasserine na Sidi Bouzid, kitovu cha maandamano hayo, yaliyopewa jina la ‘Msimu wa Machipuo”.
Rais huyo wa zamani wa Tunisia aliyeondolewa madarakani na wananchi na kisha kutoroka nchi, tayari amehukumiwa bila kuwepo mahakamani kifungo cha maisha jela kwa kuhusika na mauaji dhidi ya waandamanaji katika harakati za mapinduzi ya mwaka 2011 ambayo yalipelekea zaidi ya watu 300 kuuawa.
Haya yanajiri mwezi mmoja baada ya mtandao wa habari wa Rai Tunis kufichua kuwa: Saudi Arabia inafanya kila iwezalo kumrejesha madarakani dikteta huyo wa zamani wa Tunisia, aliyepewa hifadhi nchini humo.
Viongozi wa Tunisia wamekuwa wakiitaka Saudia imkabidhi dikteta huyo aliyekimbilia nchini humo baada ya mapinduzi ya wananchi ya mwaka 2011. Zainul Abidin bin Ali aliitawala Tunisia kwa kipindi cha miaka 24.

Leave a Comment